News

अहिले त सरकारले फिल्म बनाउनुपरेको छैन, हामीले आफै बनाएका छौँ: विराज भट्ट

काठमाडौं – अभिनेता विराज भट्ट फिल्म ‘साङ्लो’ मार्फत निर्देशकका रुपमा देखिँदैछन् । यो फिल्ममा लगानी पनि भट्टकै छ । भोजपुरी फिल्म उद्योगमा समेत राम्रो क्रेज बनाएका भट्टले लामो समयपछि नेपाली फिल्म उद्योगमा कमब्याक गर्न लागेका हुन् ।

गत शुक्रवार विराजले निर्देशन गरेको फिल्म ‘साङ्लो’ को ट्रेलर सार्वजनिक गरियो । राजधानीमा कार्यक्रमको आयोजना गरेर गरिएको ट्रेलर सार्वजनिकीकरण कार्यक्रममा निर्माण टिमसँगै ‘साङ्लो’ का कलाकार पनि उपस्थित थिए ।

एकताका फिल्म उद्योगमा एक्सन स्टारका रुपमा चिनिएका विराज लामो समय नेपाली फिल्म उद्योगबाट हराए । बरु विराज भोजपुरी फिल्ममा देखिए । झण्डै २ वर्षको मेहनतपछि उनी नेपाली फिल्म ‘साङ्लो’ लिएर दर्शकमाझ पुन: आउँदैछन् ।
अब भने नेपाली फिल्म उद्योगमै निरन्तरले काम गर्ने विराज बताउँछन् । ‘अब नेपाली फिल्म उद्योगमै निरन्तर काम गर्छु, राम्रो सिनेमा बनाउन थप प्रेसर पनि छ,’ उनले भने ।

पहिलोपटक निर्माता र निर्देशकसमेत भएका विराजले यो फिल्ममा काम गर्दा धेरै चाप थपिएको पनि बताए । ‘सबै जिम्मेवारी सम्हालेर मैले यसअघि कुनै फिल्मका काम गरेको थिइनँ, यो फिल्मका काम गर्दा धेरै दबाब महसुस भयो,’ उनले भने, ‘अहिले आएर सिनेमा हेर्दा प्रेसर लिएर ठीकै गरेछु भन्ने लागेको छ ।’

विराजले कुनै बेला सरकारले शाही नेपाली चलचित्र संस्थानमार्फत फिल्म बनाउनुपरेको तर अहिले निर्माताहरु फिल्म बनाउन अग्रसर भएको पनि बताए ।

‘अहिले सरकारले सिनेमा बनाइदिनु परेको छैन, हामी आफै बनाइरहेका छौँ,’ उनले भने ।

रकारले नेपाली कलाकारका लागि पनि केही गरिदिनुपर्ने र नेपाली फिल्मलाई महत्त्व दिनुपर्ने उनको धारणा थियो । उनले अरु देशमा फिल्मलाई सरकारले महत्त्व दिने तर नेपालमा भने फिल्म उद्योगलाई राज्यले उपेक्षा गरेको बताए ।

‘फिल्मले पर्यटन प्रवर्धन गर्नका लागि पनि भूमिका खेल्छ, सरकारले सिनेमा निर्माण गर्नका लागि सहयोग गरे हुन्थ्यो,’ विराजको भनाइ थियो ।

माघ २४ देखि प्रदर्शनमा आउने फिल्म ‘साङ्लो’ मा विराजको शीर्ष भूमिका देख्न सकिनेछ । फिल्ममा उनको अपोजिटमा पूर्वमिस नेपाल निकिता चण्डक हुनेछिन् ।

केही समययता विराज यही फिल्मका कारण चर्चामा छन् । फिल्मले सार्वजनिक गरेको गीत र ट्रेलरले सकारात्मक प्रतिक्रिया पाएको छ ।

Related Articles

Back to top button
Close