News

सन् २०३० सम्म नेपालीको आय साढे १२ हजार डलर हुन्छ : मन्त्री बाँस्कोटा

सञ्चार तथा सूचना प्रविधिमन्त्री गोकुलप्रसाद बाँस्कोटाले सन् २०३० सम्म प्रत्येक नेपाली नागरिकको आय वार्षिक १२ हजार ५०० सय डलर हुने दाबी गरेका छन्। काभ्रेपलाञ्चोकको रोशी गाउँपालिका–१ खहरेपाँगुमा जिल्ला आयोजना कार्यान्वयन एकाइ (शिक्षा)द्वारा नवनिर्मित चेतना माध्यमिक विद्यालयको भवन उद्घाटन कार्यक्रममा शनिबार उनले यस्तो दाबी गरेका हुन्।

त्यसैगरी उनले ‘मागपत्र’ बोकेर विकासे अड्डा धाउने युगको अन्त्य भएको पनि दाबी गरे। जनताको आवश्यकता र चाहनाअनुसार तीनै तहका सरकार विकासको महाअभियानमा भएकाले ‘मागपत्र युग’को अन्त्य भएको उनको दाबी थियो।

मन्त्री बाँस्कोटाले अस्पताल, सडक, बिजुली, खानेपानी, कुलो, विद्यालय र शिक्षक चाहियो भनेर मागपत्र बोकेर जिल्ला सदरमुकाम धाउने युगको अन्त्य भएको बताए। उनले वर्तमान सरकारको पहिलो वर्ष योजनाको वर्ष, दास्रो वर्ष शिलान्यासको वर्ष र तेस्रो वर्षदेखि उद्घाटनको वर्ष रहेको धारणा राखे।

मन्त्री बाँस्कोटाले मागपत्र बुझाउन गणतन्त्र नभएको दोहोर्‍याए। सरकारको लक्ष्य देश विकास–समृद्धिमार्फत जनतालाई सुखी र खुशी बनाउने रहेको उनको भनाइ थियो। मन्त्री बाँस्कोटाले प्रधानमन्त्रीको ‘समृद्ध नेपाल: सुखी नेपाली’ र स्वाधीन नेपाल निर्माणमा योगदान पुर्‍याउन सबै क्षेत्रले सहयोग गर्नुपर्ने बताए।

सन् २०२२ सम्म प्रत्येकका घरमा आधारभूत खानेपानी, सुरक्षित बस्ती विकास, रोजगारीको सिर्जना गरिने उल्लेख गदै उनले फलामखानी खुल्ने प्रक्रियामा रहेको, फलाममा आत्मनिर्भर मात्र होइन, निर्यातसमेत गर्न सकिने बताए। यसैगरी उनले शिक्षाको लगानी १० वर्षपछि प्राप्त हुने भएकाले विद्यालयको ‘जग’देखि नै देशले खोजेको जनशक्ति उत्पादनलाई मजबुत बनाउन आग्रहसमेत गरे। रासस

Related Articles

Back to top button
Close