News

आधा दर्जन छावा जन्माएकी पूजाकलीको मृत्यु

चितवन– लामो समयदेखि बिरामी परेकी ३८ वर्षीया हात्ती ‘पूजाकली’को मृत्यु भएको छ । हात्ती प्रजनन तथा तालीम केन्द्र खोरसोर सौराहा चितवनमा पालिएकी पूजाकलीको मंगलबार बिहान मृत्यु भएको चितवन राष्ट्रिय निकुञ्जका प्रमुख संरक्षण अधिकृत नारायण रुपाखेतीले जानकारी दिए ।

निकुञ्जका वरिष्ठ चिकित्सक डा विजय श्रेष्ठका अनुसार पूजाकलीको एक वर्षअघिदेखि नियमित उपचार गरिँदै आइएको थियो । ‘एक वर्षदेखि धेरै रोगको परीक्षण गरेर उपचार गरियो,’ डा श्रेष्ठले भने, ‘लाखौँ खर्च भयो तर रोग पत्ता लागेन ।’ पूजाकली पछिल्लो ६ महिनादेखि खाना कम खाने र दुब्लाउँदै गएको थियो ।

पूजाकलीले झण्डै आधा दर्जन छावालाई जन्म दिएकी थिइन् । चिकित्सक श्रेष्ठका अनुसार केन्द्रमा सबैभन्दा धेरै छावा जन्माउने हात्तीमा पूजाकली पनि थिइन् । पूजाकलीको शव परीक्षणको तयारी भइरहेको छ ।

विसं २०३८ मा पूजाकलीलाई कोसीटप्पुबाट चितवन ल्याइएको थियो । चितवन राष्ट्रिय निकुञ्जले संरक्षण गरेका ६३ हात्तीमध्ये अब ६२ हात्ती छन् । ७४ वर्षसम्मको हात्ती चितवन राष्ट्रिय निकुञ्जमा पालिएको छ । हात्तीको औषत आयु ७० देखि ८० वर्षसम्म हुन्छ ।

Related Articles

Back to top button
Close