News

नेपाली सेनाका उपरथी हमाललाई फोर्स कमान्डरको जिम्मेवारी

काठमाडौं- नेपाली सेनाका उपरथी ईश्वर हमालले मध्यपूर्वस्थित गोलानहाइटमा रहेको संयुक्त राष्ट्रसंघीय मिसनको हेड अफ मिसन र फोर्स कमान्डरको जिम्मेवारी पाएका छन् ।
संयुक्त राष्ट्रसंघको मुख्यालयले उपरथी हमाललाई यो मिसनको हेड अफ मिसन र फोर्स कमान्डरमा नियुक्त गरेको हो ।

हमाल अहिले आर्मी कमान्ड तथा स्टाफ कलेज कमान्डान्टका रूपमा कार्यरत छन् । हमाल नेपाली सेनाका अब्बल अधिकृतका रूपमा चिनिन्छन् । राष्ट्रसंघको मुख्यालयले उनको नियुक्तिका बारेमा केही दिनभित्रै सार्वजनिक गर्ने सैनिक मुख्यालय स्रोतले जनाएको छ ।

सन् १९८५ बाट नेपाली सेनामा प्रवेश गरेका हमालले नेपाली सेनाद्वारा प्रदान गर्ने सबै तालिममा उत्कृष्टता हासिल गरेका छन् ।
गुल्म, गण, वाहिनी र पृतनाको नेतृत्व गरिसकेका हमाल नेसनल डिफेन्स युनिभर्सिटी अमेरिकाबाट वार कलेज र प्रतिआतंकवादसम्बन्धी फेलोसिपसमेत प्राप्त गरेका थिए ।

उपरथी हमालले लेबनान, युगोलास्भिया, आइभरिकोस्टमा राष्ट्रसंघको प्रतिनिधिका रूपमा काम गरिसकेका छन् ।

Related Articles

Back to top button
Close